በካናዳ ማኒቶባ ግዛት ለሕዳሴ ግድብ ግንባታ ከ106 ሺህ የካናዳ ዶላር በላይ ተሰበሰበ - መነሻ - am

በካናዳ ማኒቶባ ግዛት ለታላቁ የኢትዮጵያ ሕዳሴ ግድብ ግንባታ ከ106 ሺህ የካናዳ ዶላር በላይ መሰብሰቡን በካናዳ የኢትዮጵያ ኤምባሲ አስታወቀ።

በካናዳ የተቋቋመው የጥምረት ለታላቁ የኢትዮጵያ ሕዳሴ ግድብ የማኒቶባ ቻፕተር በካናዳ የኢትዮጵያ ኤምባሲ ጋር በመተባበር በማኒቶባ ግዛት በዊኒፔግ ከተማ እና ብራንደን ከተማ የሚኖሩ ኢትዮጵያውያን እና ትውልደ-ኢትዮጵያውያንን በማቀናጀት ባዘጋጁት የቨርቹዋል ኮንፈረንስ እና የገቢ ማሰባሰቢያ ፕሮግራም 44 ሺህ 575 የካናዳ ዶላር ነፃ ድጋፍ የተደረገ፣ 13 ሺህ 550 ነፃ ድጋፍ ለማድረግ ቃል የተገባ ሲሆን፣ በተጨማሪም 47 ሺህ 900 የካናዳ ዶላር የቦንድ ግዢ በቀጥታ ከሀገር ቤት ለመፈፀም ቃል የተገባ መሆኑ ተገልጿል።

ፕሮግራሙ በተለያዩ የሃይማኖት መሪዎች ባስተላለፉት መልዕክት ኢትዮጵያውያን በዚህ ወሳኝ ጊዜ በፅናት አብረው በመቆም የታላቁ ሕዳሴ ግድብ ሁለተኛው ሙሌት እንዲሳካ ድጋፋቸውን አጠናክረው መቀጠል አንደሚገባቸው አሳስበዋል።

በመድረኩ ላይ የመክፈቻ ንግግር ያደረጉት በካናዳ የኢትዮጵያ ልዩ መልዕክተኛ እና ባለሙሉ ሥልጣን አምባሳደር ናሲሴ ጫሊ የገቢ ማሰባሰቢያ ፕሮግራሙ ላይ ካናዳ የሚኖሩ ኢትዮጵያውያን እና ትውልደ-ኢትዮጵያውያን ለሕዳሴ ግድብ ግንባታ እያደረጉ የሚገኙት ተከታታይ የገቢ ማሰባሰቢያ እንቅስቃሴ የሚያኮራ መሆኑን ገልጸዋል።

በበጀት ዓመቱ የተለያዩ ግዛቶች ውስጥ ከሚገኙ የጥምረት ለታላቁ የኢትዮጵያ ሕዳሴ ግድብ ቻፕተሮች ጋር በመተባበር አስካሁን በተካሄዱ 15 መድረኮች በስጦታ ብቻ ከ376 ሺህ የካናዳ ዶላር በላይ መሰብሰብ መቻሉንም ተናግረዋል።

ኢትዮጵያ በአሁኑ ወቅት ካለችበት ውስብብ ሁኔታ እና የረሷን ተፈጥሮ ሀብት ተጠቅማ ዜጎቿን ከድህነት ለማላቀቅ የምታደርገውን ጥረት ለማሰናከል ከውስጥ እና ከውጭ ከተጋረጠባት ጫና አንፃር ሁሉም ኢትዮጵያዊ በሀገሩ ጉዳይ ላይ አርበኛ በመሆን የሚያደርገውን ዘርፈብዙ ድጋፎች አጠናክሮ እንዲቀጥልም አምባሳደር ናሲሴ ጫሊ ጥሪ አቅርበዋል።

በፕሮግራሙ ላይ የተገኙት ተሳታፊዎች በነፃ ድጋፍ እና በቦንድ ግዥ የሚያደርጉትን ድጋፍ አጠናክረው እንደሚቀጥሉ ቃል መግባታቸውን በካናዳ የኢትዮጵያ ኤምባሲ ገልጿል።

ምንጭ፡- ኢቢሲ፤ ሰኔ 18/2013