“ኢትዮጵያ የተከተለችው ግድቡን እየሰራች የመደራደር ስልት ባለድል አድርጓታል ”አምባሳደር ሽፈራው ጃርሶ - መነሻ - am

ኢትዮጵያ የተከዜና የጣና በለስ ግድቦች ስትሰራ በነበረው ዓለም አቀፉ ጫናና ማስፈራሪያ ሳትንበረከክ በስኬት ስታጠናቅቅ ጫናዎቹ እንደ ቀነሱ ሁሉ የህዳሴ ግድብም እስክናጠናቅቅ ጫናዎቹ እየበረቱ እንደሚሄዱ ጠቁመዋል።

ኢትዮጵያ ግን ለሱዳንና ግብጽ እንዲሁም ለቀሪው ኃያላን አገራት ዛቻና ማስፈራሪያ ሳትደናገጥ የግንባታው ሥራና የድርድር ሂደቱን ጎን ለጎን በማስኬድ ያደረገችው የሁለተኛ ዙር የውሃ ሙሌቱ ከሁሉም በላይ ድል ያጎናጸፋት ስልት ነው ብለዋል፡፡

የግድቡን ግንባታ ለማስተጓጎል ጠላቶቿ ያልፈነቀሉት ድንጋይ የለም ያሉት አምባሳደር ሽፈራው፣ ኢትዮጵያ 80 በላይ ብሔር ብሔረሰቦች መኖሪያ መሆኗንና ከብረት የጠነከረ አንድነቷን ባለማወቃቸው ሕዝቡን እርስ በርስ በማጋጨት ግንባታውን ለማስተጓጎል የሄዱበት መንገድ ሳይሳካ መቅረቱን አስታውቀዋል ።

የአገሪቱን ሕዝቦች ግድቡ ላባቸው በመሆኑ ከግጭት ይልቅ አንድነት በመምረጣቸው ሴራው ከሽፏል ፣ በግድቡ ላይ ያሰቡት ሴራም ለኢትዮጵያውያን ከፍ ያለ ጥንካሬ መፍጠር ችሏል፤ በግድቡ የተያዘው ውሃ ከአቅማቸው በላይ ስለሆነባቸው ወደኋላ ለመመለስ መገደዳቸውን ጠቁመዋል ፡፡

ከዚህ በኋላ በየትኛው ስሌት የግድቡ ደህንነት ቅንጣት እንደማያሰጋና የውስጥ አንድነት በማጠናከር ከተሰራ ጠላቶቿ የፈሩት የኢትዮጵያ ከፍታ ሩቅ አይሆንም ያሉት አምባሳደሩ፣ ግድቡ ሲጠናቀቅ የአገሪቱን ኢኮኖሚ እድገት በከፍተኛ ሁኔታ ከማፋጠኑ በተጨማሪ ዛሬ ጠላት የሚመስሉ ጎረቤት አገራት ጭምር በኃይል የማስተሳሰርና የማወዳጀት አቅም እንዳለው ገልጸዋል ። ግንባታውን ሙሉ በሙሉ ለማጠናቀቅ ከወትሮው በበለጠ መረባረብ እንደሚያስፈልግ አስገንዝበዋል፡፡

በተለይ ሱዳን አሁንም ቢሆን የኤሌክትሪክ ኃይል ከኢትዮጵያ እያገኘች፣የግድቡ ግንባታ ከማንም በላይ እንደሚጠቅማት እያወቀች በግብጽ ጉርሻ ተደልላ ከኢትዮጵያ ተቃራኒ መቆሟ የሚያስገርም ነገር ብለዋል።

ያም ሆኖ ግን ኢትዮጵያ ያገኘችውን ድል ወደ ተሻለ ደረጃ ለማሸጋገር ስራዋን እየሰራች ከግብጽና ከሱዳን እንዲሁም በግድቡ ግንባታ በተቃራኒ ከተሰለፉ አገራት ጋር ዲፕሎማሲያዊ ድርድሮችን አጠናክራ መቀጠል እንዳለባት አመልክተዋል፡፡

የግድቡ ጉዳይ ለግብጽና ሱዳን የኢኮኖሚ ጉዳይ ሳይሆን የፖለቲካ ጉዳይ መሆኑ ስልጣን ላይ ለመቆየት ዓባይ ሁሌ እንደ አጀንዳ ማቅረብ ግድ እንደሚሆን አመላካች ነው ያሉት አምባሳደር ሽፈራው ፤ ይቅር ዛሬ ግድቡ ሲጠናቀቅም ሱዳንና ግብጽ ስልት በመቀያየር በአገሪቱ ላይ የተለያዩ ሴራዎች ከማሴር ወደኋላ እንደማይሉ ማወቁ አስፈላጊ ነው ብለዋል፡፡

አዲስ ዘመን ሐምሌ 15/2013