የግድቡ ሁለተኛ ሙሌት የኢትዮጵያን ሁሉን አቀፍ አሸናፊነት እውን ያደረገ ነው - የህግ ምሁራን - መነሻ - am

በዲላ ዩኒቨርሲቲ የህግ መምህሩ ሄኖክ አሻግሬ ግድቡ ሀይል ከማመንጨት በተጨማሪ ራሱን የሚከላከልበት ደረጃ ላይ መድረሱ ሁሉም አሻራቸውን ያስቀመጡ ኢትዮጵያውያን አሸናፊ የሚያደርግ መሆኑን ተናግረዋል።

ከመረጃ እጥረትና በሀሰት ፕሮፖጋንዳ ከግብፅ ወገን የተሰለፉ ሀገራትም የአሰላለፍ ለውጥ እንዲያደርጉ አስተዋፅኦ ይኖረዋል ብለዋል ምሁሩ።

ኢትዮጵያ ሙሌቱን ስታካሂድ የታችኞቹ የተፋሰስ ሀገራት ውሃ አለመቀነሱን በማሳያነት ጠቅሰዋል።

በወሎ ዩኒቨርሲቲ የህግ መምህሩ ደጀን የማነ በበኩላቸው ግድቡ ሀይል ለማመንጨት የሚያስችለውን ውሃ መያዙ ወሳኝ ምዕራፍ መሆኑን አመላክተዋል።

ይህም የፍትሃዊ ተጠቃሚነትን መርህ የሚያፀና ብሎም የኢትዮጵውያንን የዘመናት ምኞት ወደ እውነት የቀየረ ብለውታል።

ምሁራኑ ሙሌቱ የህዝቡን ተስፋ የሚጨምር መሆኑን በመጥቀስ እስከ ፍፃሜው ለመትጋት ያስችላል ነው ያሉት።

የግድቡ ግንባታ ሂደት አሁንም የኢትዮጵያውያንን ትብብርና በጋራ መቆምን ይጠይቃል የተባለ ሲሆን በተለይም ዳያስፖራዎች ታሪካዊ ሀላፊነታቸውን እንዲወጡ ጥሪ ቀርቧል።

በውጭ ሀገራት የሚገኙ ኢትዮጵያውያንና ትውልደ ኢትዮጵያውያን በያሉበት ሀገራቸውን በመወከልና የገንዘብ ዝውውር መንገድን ህጋዊ ብቻ በማድረግ በጋራ ሊቆሙ ይገባልም ነው የተባለው።

fbc